عاوزينك...مزنوقين فيك
واضح جدا ان جمال أعطي الضوء الأورانج والأحمر والأخضر رسمياً للبدء ف حملته الإنتخابيه..وشئنا أو أبينا هنضطر اسفين نتدخل ونقول رأينا..مش عشان حد يسمعنا لا سمح الله.. او حد يعمل بيه والعياذ بالله ...دا مجرد تنفيس بس رغم إن الواحد مكسّل..
بدأوا بدري .إستفزاز ف كل مكان والواحد عمال يقول اللهم إخزيك يا جيمي وأضيّع.. وأعمل عبده الأهبل...
لو علي قد الأطفال اللي بتدير الحمله بعدم خبره عالفيسبوك مش مشكله60 او 70
شاب كل واحد فيهم عاملله عشر أكاونتات وباقي العدد شباب المعارضه بيهاجمهم العيب بقي علي ...
من يدير شباب الحزب الوطني
واحد أسمه (سيد رشوان) والتاني (أحمد حافظ) ودول بقي حدث ولا حرج أسلوب ركيك ف الجرايد الورقيه وف الالكترونيه ..وعلي الفيسبوك
أي شخص ضد جمال مبارك عدو شخصي لهم وعميل بيقبض من الخارج ..هيا كده عافيه ..وشخص عاوز يهد البلد ويخربها فقط لأنه رافض جمال
خدوا قايمه الإتهامات اللي بيرددوها من ضباط الداخليه واللي هايتهم بيها أي معارض خلال فتره الإنتخابات
الإنتهازيه أي حد يفكر يحكم مصر يبفي إنتهازي ما عدا هوا-الإساءه للحزب الوطني-وجود مصالح مع جهات اجنبيه غربيه- سب وقذف رموز الدوله-زعزعه استقرار البلاد الذي تحقق علي مدي حياه الرئيس حسني مبارك - افلاس - حقد ضد الاستاذ جمال مبارك ودي عقوبتها تغسل قلبك سبع مرات بالتراب- اخر تهمه هناك ايادي خفيه تحركنا لخدمه اهداف معينه.
دي التصريحات الإعلاميه لمن يدير شباب الحزب الوطني في تسويق جمال
الحمله:
الحمله اسمها عايزينك؟؟؟ أه والله عايزينه..وبعدها كاتبين طالبينك؟؟؟؟
لا قالو عايزينه ف إيه ولا طالبه معاهم منه إيه؟وطبعا زي أي حمله لازم يطلعلها شويه إنبثاقات يعني اللي عايزينه إنبثق منهم محبي ومؤيدي وعشاق...أكرر عشاق جمال مبارك.أول مره ف تاريخ البشريه أشوف مرشح كرئيس دوله وعربيه له عشاق زي الأخت لا مؤاخذه ميريام فارس أو الأخ لا سمح الله تامر حسني .وطبعا نتيجه لقله الخبره والغرور في فرض الرأي مش عارفين الفرق بين أفيش فيلم وبانرحمله كانت النتيجه عملو صور لجمال مبارك كأفيش فيلم( جيمس بوند)فاضلّله اتنين موزّز ومسدس بيريتا إف إش إح سبعين ميللي..واقف بوزات إستعراض حلاوه وطعامه وإديها بقي شعارات ...شعارات المفروض سياسيه لرئيس دوله...لست حلما في الخيال انت (مطلب) يا جمال اعتقد كان مفروض يغيرو حرف الطه ف كلمه مطلب بحرف القاف ...
ينفع حمله من غير إيفنتس؟؟؟؟
ما تجيش...... ياللا هوبا يوم 14/12 يوم تأييد لقائد كتيبه الفكر الجديد..علي أساس أنه سمير جعجع مثلا وإديها بقي ...المؤتمر الوطني الألكتروني الرافض لمؤتمر أيمن نور تحسسك بعادل امام وهوا بيقول ويخرب بيت اللي بيحبو..ومن جواه بيحبو .. وواقف جنبه حد بيكرهو.
عمركو شفتو دوله حزبها الحاكم يعمل مؤتمر ولو حتي إلكتروني لرفض مؤتمر شخص؟؟؟طب إعملو مؤتمر لرفض قانون.. ظاهره مناقشه..إعملو مؤتمر إقعدوا صوتو وعيطو علي ضحايا القطارات....مؤتمر رافض لمؤتمر؟؟؟فكر جديد بقي ما علينا
شباب الحمله:
اللي مفروض إسمهم نشطاء إنترنت وكوادر الحزب الوطني شباب أوكل إليه الحزب تسويق جمال إلكترونيا بطريقه تكسبه شعبيه وتحشد حواليه الشباب...اللي عنده إكتئاب يتابعهم هايفوق علطول شوفو بيقنعوا الشباب...
ليه جمال؟؟؟؟
ومفيش غلطات إملائيه من عندي دا زي هما ما كتبو وأنا تعليقي بالأسود:
جمال هينشلنا من التخلف لأن عنده كاريزما عليه
مش المفروض ان ابوه هوا اللي خلانا متخلفين واحد بشهادتكو ابوه خلانا متخلفين طب هوا بقي هايبقي ايه؟
نحن نقيد جمال مبارك
اه هوا كاتبها نقيد عادي فكر جديد
عاوزك عشان ف ايدك كل الحلول؟؟؟؟؟
مقالش ولا حل منهم مخلي كل الحلول ف إيده لغايه ما يمسك ولو ما مسكش مش هايديهالنا
ياسمينا بقي واااااو..ياريت والله جمال ياريت والله جمال ليه؟ أصله واخد عالرئاسه
واخد عالرئاسه؟؟؟؟زي انا كده ما واخده عالواد محمود وهوا واخد عليا....حاجه تشل
نحن شباب الحزب الملكي نسعي لعوده الملكيه لمصر فهي الأمثل والأكثر إستقرارا ونوافق علي جمال
طيب
نعم من العقل والقلب لجمال مبارك .المعارضه المصريه هي الوحيده ف العالم التي تريد أن يأتي لها الحزب المعارض بمرشح علي هواها وده غباء سياسي
اللي جاي دا بقي عسل
نريد رئيسا ينزل بسيارته ليجمع الأطفال من الشوارع ويحنو عليهم ..نريد رئيسا ينزل بسيارته للمستشفيات ليري المرضي ..نريد رئيسا يقضي فترتين ثم يذهب واذا وافق السيد جمال فليقسم علي التنفيذ
يا وله إيه الجبروت دا ؟؟ فليقسم؟؟؟؟ قالو للرئيس أقسم....
فكرني بحدوته كان في مره واحد فقير ..الطباخ اللي عنده فقير.. والسفرجي بتاعه فقير...
أنا هاقوله نريد رئيسا ينزل بطيارته يبص علي اللي ماتو في حادث القطر البيه كان مش فاضي كان بيفكر هايلبس ايه بكره عشان هيشارك
نجل الرئيس مبارك مجهض الأحلام الصفويه في أرض الكنانه
خضتني يا عم الحاج
فاضل جملتين من اللي استفزوني واحد جه يكحلها عماها والتاني رد خيال علمي
نعم لتوريث جمال مبارك رئيسا لمصر
الجمهوريه الملكيه دي مخرجات جديده هنصدرها للغرب
كله كوم واعلانهم عن تكوين تحالف مع الاحزاب المواليه لهم لعمل حركه اسمها(ابتزازكو) ردا علي المعارضه ولما قيل لهم ان اسم الحركه مش لطيف قالو دا اسلوب التعامل مع المعارضهودي اللغه اللي بيفهوها؟؟؟
الخليجيين عاوزين جمال مبارك ليه؟لأن وصلهم إن لو مش جمال هايبقي الأخوان وبس فبالتالي يؤيدوا جمال خوفا علي شيرين عبد الوهاب المطربه متغنيش تاني
اخر واحد دا صاااااااااااايع قالها لجمال بكل لهجات الوطني العربي يا جمال
بالمصري عاوزينك
بالسوري بدنا اياك
باليمني نشتهيك
بالخليجي نبغاك
بالمغربي بنموت عليك
عايزين جمال... طالبينه بس مش عارفين ليه؟
لكن المعارضه أولي بالحمله دي... إحنا كمعارضه فعلاً عاوزينه وطالبينه بس عارفين ليه
تفتكرو ليه؟؟؟؟........عايزينك... طالبينك ...علشان........
