لما سألونى من ستنتخب ؟؟ قلت بثقة مبارك
وعندما سألونى لماذا مبارك ؟؟
فقلت للأسباب الأتية
الرجل القبطان
طبعاً ربان السفينة ودى مش هنتكلم فيها كتير.
الرجل الدائم
قاعد معانا بقاله 30 سنه وهيقعد معانا لماشاء الله وفيه منه واحد كمان علي صغير وعلشان كده احنا اخترناه.
رجل الرياضة
رجل فرفوش هو وأسرته بيحبوا الكورة ومفضى الشباب لتشجيع الكورة بلا شغل بلا بتاع ومشجع فتح الكافيهات فى كل حتة فى مصر
الرجل النووي
تلاتين سنة بيدرسوا قطعة أرض واحدة عشان مفاعل واحد من8 مفاعلات البلد محتاجاهم للطاقة النظيفة اللى هتغطى البلد كلها ودا برنامج انتخابى وعلى الطلاق ما هو ماشى الا لما يخلصه
رجل اصلاح الإفساد
يعني الافساد اللي حصل ف عهده هوا برضو اللي هيصلحه عشان دا افسادهم هما وهما اولي بيه حاجتين ف حاجه موضوع كبير مش هعرف افهمكو
رجل الكوادر
اللى بعين فنان بيكتشف رجاله هتلاقى فين رجال دولة اختيارات نقاوة فرز أول زى رجال مبارك ابراهيم سليمان – عز – يوسف والي – شهاب – الشاذلي – ولا صفوت الشريف اللى قال عنهم أحد أقطاب الحزب الوطني رداً على إتهام الرئيس إن البلد مفيهااش كوادر فقال مدافعاً ان دول من افرازات الرئيس
هما فعلاً إفرازاته
رجل المواكب
كان رائد فى موضوع المواكب وتعميم فكرة المواكب طالما توفرت لك الشروط فلك كل الحق فى موكب مدام ربنا مديك بل وأقول أكثر من ذلك ساوى فى المواكب حتى الناشط السياسي عدو البلد ساعة القبض عليه بيتعمل له موكب زيه زي أى وزير
رجل الحرب والسلام فى نفس الوقت
بحكمته كل ما اسرائيل تتعدى على اتفاقية كامب ديفيد يصيح فى وجه الصارخين " احنا مش أد الحرب " "مش هحط ايدي فى بوء الأسد " وأحمد نظيف صرح أكثر من مرة ان الجيش المصري مش مستعد لخوض حروب وفجأة لما حصل مشكلة نهر النيل فوجئنا برجاله فى المجلس بباوى وعبد الفتاح عمر بيعلنوا الحرب منهم لنفسهم على سبع دول مرة واحدة عشان المياة وكانت كلماتهم " سنحارب وسندك دولاً بأكملها حماية لأطفالنا " مش بقوللكم رجل المفاجأت
رجل اليوجا
ناشر مبادىء الحكمة وضبط النفس بل هو المادة الخام منها ضبط النفس مع الجزائر ومع اسرائيل ومع السودان ورفض الحصار على السودان فى أحداث إغتياله ومع ذلك قبلها على غزة ومفيش ضبط نفس مع قوي المعارضه
رجل الرالي أو الرجل الماراثوني
اللى الصحافة بتلهث من الجرى وراه عشان تغطى نشاطاته
رجل القدر
مؤمن بالله وان العمر واحد والرب واحد يصرف عالصحة والمستشفيات اللى انهارت فى عهده ليه ؟
وهو عارف ان كل إنسان مش هيعيش أكتر من اللى مكتوب له لكن مفيش مانع ان هو شخصياً والحاشية يتعالجوا برة ودا ليه ؟؟ لأن البلد محتاجالهم
رجل المستقبل
تفكيره سابق لعصره ولأنه عارف تماماً إن مصر 2020 هتكون فيها حرب مياه فوضع خطط بديله سريعة مستبقة وبدأ يعوّد الشعب ياكل خضار مروى بمياه الصرف الصحى عشان على 2020 تكون بطننا مسكت
رجل التعليم
كمواطن مصرى اتعلمت أسوأ تعليم فى أسوأ مدارس فإذا جاء رئيس أخر وحاول تحسين منظومة التعليم من باب التغيير سينتج جيل من أبناءنا متعلم أفضل مننا مما سيجعل جيلنا متخلف أمام هذا الجيل وأعتقد ان كل مصري ذكى وحريص ألا يضع نفسه فى هذا المنزلق
.
رجل أمريكا واسرائيل هو وبس
فى كل لحظة يتحدث عن مدى اعجاب الإدارة الأمريكية به وثقتها فيه ومدى عمق العلاقات وكذلك إعجاب الإسرائيليين بذكاءه وحكمته فى إدارة الملف الفلسطينى مانيوال بإيده الطاهرة وعشان كدة واقف محلك سر من يومها لكن لو أى فرد غيره اياً كان تعامل من قريب أو بعيد مع أمريكا أو إسرائيل يبقى عميل وبيقبض من أمريكا وإسرائيل اللى بيحيكوا مؤامرات ضد مبارك اللى هو ايه يخليك كمواطن قاعد كدة مش عارف لك عدو من حبيب ودا يديك شعور انك مش فاهم حاجة بس الريس مصحصح للبلد
رجل الوحدة
اللى وحدنا... بمعني بقينا لوحدنا خالص فى الكرة الأرضية تقريباً أساء علاقتنا مع الدول العربية كلها من باب بلاش تخلف وترويج حزبه لفكرة احنا مش عرب احنا فراعنة ومفيش فراعنة فى الكرة الأرضية غيرنا وأساء علاقتنا ب.الدول الأفريقية كلها من باب ان الإختلاط بيهم بيجيب أمراض عشان يحافظ على نسل المصريين بس
رجل البنية التحتية
اللى سمعنا عنها 30 سنة ولسه مشفنهاش وأعتقد من حقنا نشوفها واحنا معاه لماشاء الله
أنتخب مبارك لأن مصر لسه فيها شويه خير ولازم مبارك يكمّل عليه
حتى تنهار الدولة تماماً
ونحضر مع بعض بداية بناء مصر جديدة ..
مصر اللى كنا بنسمع عنها ..
مصر اللى بنتمناها ..
مع مبارك برضو
