أنا مواطنه مصريه مش عسكري مجنّد ف الجيش انا عايشه ف وطن مش في معسكر وبلدي إسمها "مصر" مش كتيبه مدرعات رقم تمنتاشر وطالما المجلس العسكري إختار بملئ إرادته إنه يدير البلد ورفض رفض تام بتشكيل مجلس رئاسي مدني يبقي يسري عليه اللي سري عاللي قبله واللي هيسري عاللي بعده
طالما اتصدر وقال هاحكم يبقي المجلس لازم يعرف اننا مش هنعيش بأوامر وبيانات عسكريه.
البلد دي ملك الشعب وإحنا الشعب والمجلس العسكري "عاوز" أو "مصمم" يدير أملاكنا صح؟ غريبه أوي أول مره أشوف حد ييجي يدير أملاكي ويشرط عليا لا أنتقده ولا أجيب سيرته من قريب أو من بعيد ولا حتي أفتح بؤي بكلمه لو ما عجبنيش أداءه وإلا هيحاكمني محاكمه عسكريه؟؟؟؟.
القوات المسلحه اللي بنقول عليها ف لغتنا الجيش علي عيننا وراسنا المجلس العسكري مش الجيش المصري المجلس العسكري مش القوات المسلحه المجلس العسكري مجموعه من الضباط اختارت نفسها بدون معرفتي بيهم ولا رغبتي لحكمي واداره شئوني برضو بدون رغبتي يبقي لازم أنتقده لان كل قراراته من يوم ما تولي شئون البلاد بتتطبق عليا وحولتني من سئ لأسوأ.
الثوره اللي قمنا بيها بتنضرب ف مقتل وحاسه اننا بنتعاقب عقاب جماعي عليها مطالب الثوره اللي خرجنا نطالب بيها ومات عشانها ولادنا وصحابنا وجيراننا ولسه محدش اتحاسب بعد ما كنا بنطلبها بكل قوه بقينا بنشحتها بنستجدي مطالب الثوره واحنا اللي بنتحاكم واحنا اللي بنتحاسب .
ثوره يعني قوه يعني محاسبات يعني تطهير يعني محاكمات يعني احنا اللي نحكم فاهمين ثوره يعني اللي مؤمن بالثوره هوا اللي يحكم عشان كده انا هنزل يوم 27 الثوره لازم تكمل اللي ثارو لازم يحكمو
