12:37 PM

هوة احنا..شعب لقيط؟

Posted by high_staff


نزل على الخبر كالصاعقه رئيس الوزراء قالها بصراحه:الدوله مش بابا والحكومه مش ماما
.وعلطول افتكرت والدى الله يرحمه كان دايمأ يقوللى ماتتعشميش من البلد دى خير.مصر خلاص.وكنت اقول له مصر دى امى
كان بيبص لى بحسرة وعنيه كلها كلام ويسكت طول عمرى كنت حاسه ان فيه سر مخبيينه عليه
.مصر مش امى ولا امك ولا ام محمد الشرقاوى وأكرم واسماء وعلاء ولا ام اللى ماتوا فى العبارة والكام قطر
أصابنى زلزال وبدأت تتابع المواقف والصور سريعه امامى .ازاى ماكنتش واخدة بالى
الحكومه والطبقه الحاكمه الغنيه طول عمرهم بيتكلموا عن نفسهم بصيغه احنا وانتم.انتم دى يعنى احنا الشعب
علشان كدة كنت دايمأ أستغرب اتعلمنا ان الأم حنان وعطاء واحنا الشعب عمرنا ما شفنا حنان ولا عطاء
الغنى يطلع فى التليفزيون يقول مصر ادتنى كتير والفقير يطلع يقول ماشفتش من البلد دى خير.الغنى عارف يعيش ومستمتع بيها
لكن احنا الشعب لأ.نسمع عن جمالها لكن مش بنشوفه.جمعيه جيل المستقبل
بتغنى بكرة اكيد لينا..طبعأ حقهم لكن الشعب مايقولش ايه ادتنا مصر يقول هايدى ايه لمصر لأنها مش هتديه
هيه امه عشان تديه؟.
علشان كدة لو فكر يتطاول وياخد ما ليس من حقه بياخد ايوة بياخد.. بالجزمه فى سنانه اهو بياخد وخلاص
هما املهم يعيشوا فيها للأبد.احنا املنا نهج منها
.اخيرأ اتضحت الحقيقه مصر مش امنا
مفيش ام تعمل فى عيالها كدة.احنا شعب لقيط لقيونا على حدود بلد واحنا صغيرين وياريتهم ما خدونا كانوا سابونا أحسن.
طيب اذا كانت الحكومه مش ماما والدوله مش بابا ممكن أعرف مين ابويا؟مين ابويا؟
احنا ولاد حرام وللا ايه يا نظام؟وسلم لى عالخطايا.

 
Copyright © 2010 لامؤاخذه مصرية | Design : Noyod.Com