لقيت ف قناه دبى
برنامج عن المدن القديمه المفقوده طبعا برنامج يشد اى حد ف الدنيا كان علماء اوروبا بيبحثوا عن موقع لمدينه اسمها بيراميس عاصمه رمسيس التانى وشاكّين انها تحت قريه قنطير فى الدلتا واجهزه مسح كهرومغناطيسيه لحد ما عملوا تصوير كامل تحت القريه للمدينه بتفاصيلها وحولوا التصوير الى جرافيك مفصّل. كل العلماء اجانب وكل الاجهزه قمه فى التكنولوجيا الحديثه الّلى ما شفت عالم واحد مصرى وسطهم. حضاره العالم الاوربى الحديث تبحث عن حضارتنا القديمه وانا أخر اخبار عندى لزاهى حواس ان البرنيطه بتاعته جايبه شىء وشويات ف سعرها وان ابو الهول هينهار من المياه الجوفيه بس الاختلاف هينهار كمان شهرين ولا سنتين
المهم
قلبت على دريم لقيت برنامج الطبعه الاولى ومحمد المسلمانى يقول بحسره كلمات اغنيه شعبان عبد الرحيم الجديده فالفنان شعبان لم تعجبه كلمه تلقيح و تخصيب فسمى اغنيته الجديده هنلأح اليورانيوم من التلئيح يعنى.
الساعه تسعه ونص طلعت على المحور تعذيب وقتل للشاب احمد صابر ف قسم العمرانيه والقاء جثته عاريه امام القسم ولقطات للشاب فى غرفه العنايه المركّزه ودفاع السيداللواء احمد ضياء الدين كالعاده: دى مشكله فرديه. لانسمح بالتجاوزات. لايوجد خلل بالشرطه .لا داعى للتربص برجال الامن.
انتقلت الى دريم برنامج العاشره مساء تحقيق عن سياره شرطه اقتحمت منزل فى غايه البساطه للقبض على فتاه متهمه بشرااااء مسروقات مش سرقت
المهم سياره الشرطه دهست زوجه اخيها وقتلتها تحت عجلاتها وبرضه نفس اللواء بيقول نفس الكلام ولما سألوه ايه سبب عنف الشرطه قال: العولمه
ختمت الجوله بالفضائيه المصريه لقيت اعاده خطاب الرئيس العظيم حسنى مبارك للحزب الوطنى بيقول يجب ان نقف جميعا ونفخر بكل ماانجزناه على مدى السنوات الماضيه.....
فى خلال ساعتين دماغى ضربت
- الماضى العظيم
الواقع المرير
المستقبل المعفن
ودخلت على الانترنت اعمل سيرش على اغنيه شعبان هنلأح اليورانيوم
