9:18 PM

"فضها مسيره"

Posted by high_staff

طبعا محدودى الدخل عاجزين عن الشكر للحزب الحاكم والحكومه القائمه ببرنامجه سواء فى انطلاقته الأولى أو الثانيه مش عاجزين عن الشكر بس ده مكسحين كمان وأصبحت كلمات مثل الأسعار غاليه .. العيشه نار كلمات كانت تقال فى زمن ولىً ودخلنا فى مرحله هنعيش إزاى؟؟ 
أنا من رأيى ..
لتكن لنا فى الزرافه عبرة وقدوه خدنا إيه من البروتين إلا المرض ورق الشجر خفيف عالمعده وهتوفر الدوا وفى حاله المرض خللى نفسك عزيزه وإيمانك بالله قوى فالشافى هو الله . طب المواصلات ؟ 
المشى رياضه وبعدين هاتروح فين؟
ده من خرج من داره إتقل مقداره ولنا فى الحوادث عبره لعلنا نتعظ نروح على التعليم ..مجانى؟ 
مفيش مجانى شغل أبو بلاش كتر منه ده لازم نبطله اللى مامعهوش ميلزموش وبعدين خدتوا إيه من العلام إسم اللى على مكانه الجامعات المصريه فى قائمه العالم وحوش البحث العلمى بيشر مننا.
حلينا مشكله الأكل والعلاج والتعليم فاضل اللبس على نهايه الانطلاقه الثانيه لازم نكون حلينا الحكايه دى خصوصا إننا بنشتكى إن الشعب مالوش زى مميز زى باقى الدول العربيه؟
والجلابيه المصرى مش مناسبه وكمان غاليه نعمم زى الراحل العظيم غاندى على الشعب كله الكفن مالوش جيوب وإحنا شعب زاهد وحمول والانسان مش بمظهره .
مش عاجبك ده كله اتمنى تموت بس تموت حاليا فى عهد الحكومه الحاليه ليه؟
قلتلى ليه لأن المسيره لسه فى أولها وشكلها طويل والريس لسه ما إتخنقش مننا ومطول باله علينا . السبب الثانى ما تتمناش تموت فى بيتكم لأ.اتمنى تموت فى حادث اليم عشان الحكومه هتشيل مصاريف الجنازه وتبشبش الأسره وتندفن على حسابها وبسرعه عشان إكرام الميت فى حادث اليم دفنه وكمان جنازتك كلها أمن مركزى ومخبرين ..
وبعدين دا لسه فى انطلاقه ثالثه ورابعه هاتستحمل يعنى
والريس قالها بصريح العباره .. إن همى الأول بل كل اهتمامى موجه لمحدود الدخل .. يعنى الريس حاططنا فى دماغه مالأخر.

 
Copyright © 2010 لامؤاخذه مصرية | Design : Noyod.Com