عادي جدا عجبتني صوره فوتوشوب معموله لحسني مبارك موجوده علي جوجل خدتها وعملتها بروفايل...التحديثات اللي بتتعمل في الفيسبوك كل حبتين دول بتفتح اي حاجه انت قافلها عندك انا قافله ان حد يضيفني او يشوف صوري وكده يعني المهم الاكاونت دا قليل لما بافتحه...وعشان متناموش مني الاكاونت بقي سداح مداح والصوره انكشفن وبان.
الطبيعي ان عين الامن الساهره علينا عالانترنت وزي المتوقع واللي بيحصل يتسلط عليا شئ من الاشياء بتاعتهم اللي بتدخل تشتم وتهدد وهاجيب امك واسلوبهم الحقير اياه....جالي ايميل فتحته وانا وائقه ان محتوياته هتكون شويه قله ادب وقذاره وخلاص لكن للاسف مما احزنني وقطع في قلبي ودمّر ذات نفسيتي من جوه انهم استخسروا فيا ظابط ولا حتي عسكري بعتولي واحد اهبل
إليكم الميل:
...... Mohammed Osh April 21 at 12:36pm Report
...... Mohammed Osh April 21 at 12:36pm Report
اولا انتى مين
ثانيا ليه الصوره ديه حطاها يريت انتى متحبيش حد خليها جواكى لان فى كتير اوى غيرك بيحبو وانا منهم يريت تشيلى الصوره ديه واى صوره تنيه تهينه لو انتى مصريه فا بامثلك عمرنا ماهنتقدم طول مافى ناس بتكره بعض ومبارك احسن من غيرو بكتير وعلى فكره انا لاليه فى السياسه ولا يحزنون بس الراجل ده انا بحبه جدا وعيب اوى لما الابن ينصح الاكبر منو وده مش اسلوب ناس متقدمين ولا عقلين ويريت تشيلى الصوره ديه هيا والصور التنيه خليكى فى نفسك نفسى مصر تنضف وكلنا نحب بعض ومفيش انسان معصوم من الاخطء الي ضحى لاجل وطنه لاجل مايعود النهار والي اسم مصر كان له دايما طاقة الانتصار بحب مباركبيقوللي لو مبتحبيش مبارك خليها جواكي؟؟؟لأن كتير غيري بيحبوه يعني اللي بيحبه بس يتكلم واللي مبيحبوش ينكتم ويخليها جواه
بيأمرني اشيل الصوره واي صوره بتهينه
في الوسط بما أني مش بحب مبارك يبقي دوغري علطول أنا أكيد مش مصريه إرتباط شرطي زي الصهيونيه والإسرائيله أو الجبنه والطماطم هوا كده .
أي مصري مبيحبش مبارك في نظره عائق للتقدم اللي ماشي فووووووووووووو واحنا بنعوقه وامثالي هما اللي مأخرين البلد لمجرد بس اننا مبنحبوش من جوانا دا مخليهم مش عارفين يتقدمو عرفتو ليه عاوزين يضربونا بالنار تواجدنا ناحس التقدم
والمطلوب مني اخليني في نفسي يعني افتح نفسي كده وادخل جواها واخليني جوه ولو عملت كده مصر هتنضف هههههههههههههههههه مش فاهمه ايه علاقه
ان الدوله فشلت في حل مشكله الزباله في مصر كلها بيا؟؟؟؟؟
وإن عيب قوي لما أكون في سن أمه وهوا ينصحني ويعرفني الصح عيب علي سني يعني
في الأخر إعترف إن مبارك إنسان مش ألهه يعني؟؟؟ وبما إنه انسان فهو مش معصوم من الخطأ اللي كاتبها غلط طبعا لانه جيل تعليمه الأساسي كله في عهد مبارك في التعليم الرفيع
والمفاجأه بقي القنبله الأخيره اللي انهي بيها الايميل انا بطني هتنفجر م الضحك
