11:28 AM

عصر الشفافيه بالعصّاره

Posted by high_staff

عصر الشفافيه بالعصّاره
زى باقى الشعب فهمت غلط ودا اللى كان بينبهنا له السيد رئيس الوزراءاطال الله؟؟
هوه مش ناقص اصلا .السيد احمد نظيف قال الشعب لسه بيتعلم مبادىء الديموقراطيه عشان
احنا شعب جاهل وفهمنا على قدنا والحكومه بتعاملنا معامله الاطفال "عشان كده بننضرب لما بنغلط"وطلع
كلامه صح احنا فعلا مبنفهمش الحكومه قال نحن فى عصر الديموقراطيه وعصر الشفافيه
وعصر الرياده وعصر الرخاء وعصر التكنولوجيا احنا فهمنا كلمه عصر بمعنى زمن او وقت وبناء
على ذلك قمنا هايجين زى المجانين فين ده؟ وباماره ايه؟ وقلينا ادبنا .كان لازم نتأدب ساعتها عشان نفهم ان الحكومه
لا تكذب .حاشا وكلا فقد كانت صادقه فى كل كلمه الخطا وسوء الفهم جاء من مفهوم كلمه عصر عند كلا الطرفين
فكلمه عصر عند الحكومه كانت بمعنى العصر من الفعل يعصر يعنى الديموقراطيه
لا مؤاخذه لو اعتبرناها خيشه وكانت غرقانه ميه وعصرناها اى جففناها من كل ما فيها وهكذا فالديموقراطيه
معصوره من الديموقراطيه يعنى محدش ينطق والشفافيه بعد ما تتعصر زى ما انت شايف لا تسال عن ذمه ماليه
ولا تهين ولا تنزل من بيتكم وعصر الرخاء الحمد لله عصروة لما بقينا جلد على عظم ومش لاقيين ناكل ولا نشرب
احسن ده حتى الاكل والشرب بيجيب امراض .
ما وراناش الا البورصه وعصر الرياده اوعى تتكلم عن رياده فى البحث العلمى ورياده فى الرياضه وجامعاتنا
على قمه الجامعات فى العالم من ناحيه الرياده احنا قاعديين على قمه العالم ومدلدلين رجلينا اما عصر التكنولوجيا
حدث ولا حرج الشعب المصرى كله حتى اطفال الشوارع تحت الكبارى مايقدروش يستغنوا عن التكنولوجيا
عشان كده الدخليه استصدرت امر بحجب مواقع على الانترنت ومراقبه المكالمات
اعتقد الحكومه كانت صادقه والشعب اساء الفهم ومع ذلك مستحملانا وعندها
استعداد وتسامحنا وده بس عشان احنا عايشين فى...عصر مبارك
ازهى المعاصر
اقصد ازهى العصور...................
  • انا

 
Copyright © 2010 لامؤاخذه مصرية | Design : Noyod.Com