9:24 PM

عادل لما خرج

Posted by high_staff

محدش يتوقع انى هاكتب اى حاجة عن عادل لان مينفعش....تجربة عادل بالذات مينفعش تمر مرور الكرام نهائى ولو تجربة عادل د ى مرت يبقى الافضل لكل واحد فينا يحط لسانة جوة بؤة وزى الكلاب واقل من الكلاب كمان نروح ننضم للحزب الوطنى وياريت يقبلونا .

عادل لازم كل واحد فينا يقعد معاة ويسمع منة تفاصيل ما حدث ويحط ف دماغة ان دة هيحصل معاة وبيحصل لغيرة كتير وهيحصل لغيرة لسة جاى اللى حصل لعادل رغم انة بيحكية ببساطة وعفوية وضحك.. كارثة بكل المقاييس لما امن الدولة يتعامل مع شاب صغير معارض على الانترنت على الملأ بهذا الفجور وهذا الكم من القذارة..

كل ما سمعناة عن ابو غريب وجوانتنامو يحدث ف سجون
أمن الدولة واحنا نقف نهلل ونعمل وقفات وبعد ما يطلعلنا اللى كان جوة عادى نشوف اللى يتمسك بعدة...

اعتقد ان لازم اسلوبنا يتغير ومواقفنا تبقى اقوى انا عارفة الردود اللى هاتتقال ومعاكو فيها بس برضو لازم نتطور لازم نبقى اقوى

اسمعو لعادل كويس قوى وياريت تكون قضيتة قضيتنا كلنا نتبناها معاة يرفع قضية على احتجازة الغير قانونى. على اختطافة. على تعذيبة. ثم ؟؟؟؟البراءة

نخللى الموضوع دة شغلانتنا يمكن تجيب اى نتيجة ولو واحد فى المية لانهم اتعودو يعملو اللى يعملوة وبيبقى اقصى الامل عندنا انة بس يطلع وبعدها بنسكت احنا عاوزين بقى منسكتش زى ما بنقلب الدنيا عشان المعتقل يطلع نقلب الدنيا عشان اللى اتاخد ظلم وطلع براءة يترد لة اعتبارة وزى ما فى الاقسام بداو يفكرو قبل ما يعذبو الناس ولو حتى بنسبة بسيطة برضو يفكرو قبل ما يخطفو ويعتقلو

من الحاجات اللى ضحكتنا حكاها عادل ان الباشا بتاع امن الدولة ف التحقيق قاللة انت ازاااااى بترفع صورة عالإيميل؟ وطبعا بما إن الإوضة مفيهاش كمبيوتر واحتمال كبير ان عادل كان متغمى شرحهالة شفوى كومبوز واتاتشمنت وفايل وبراوز والصورة ...لكن الظابط اللى بقى ظابط ودخل الكلية وراح امن الدولة بالواسطة إما عشان ابوة او خالة او عشان طنط فيفى تقرب لطنط تيتى مرات اونكل مراد اللى ف امن الدولة عينة عشان راسم علية لبنتة.. الحمد للة مخيبش ظننا فية ومفهمش لانة لما راح ينفذ انصدم ف ذكاء امة رجع لعادل وقاللة منتش ماشى الا لما اعرف...شفتو مستوى الذكاء بتاع ظباط امن دولتنا عرفتو لية كل الجرائم بيجيبو القاتل فى ثانية؟

الى ىىىىىى اوب يمد ايدة ف الشوال يطلع لنا مختل عقليا.

وانا كدة فهمت لية الظابط قاللة هوة انت لما تطلع هتكتب اللى حصل هنا فى مدونتك عالانترنت؟

عادل فاهم ان قصدة عالتعذيب انا اقطع دراعى ان الظابط كان قصدة عالغباء

 
Copyright © 2010 لامؤاخذه مصرية | Design : Noyod.Com